دليل البشرة الجافة

اكثر بشرة تحتاج عناية هي البشرة الجافة ، واذا كانت البشرة الجافة حساسة تحتاج عناية اكثر

البعض عنده بشرة جافة من عرف بشرته والبعض الثاني بسبب تغيرات بالجسم او بالجو يتغير نوع البشرة مثل لما يجي الشتاء تتقشر البشرة وتصير مشهبة ، او لما احد يمشي على كورس دواء يقلب له نوع بشرته

في هاذي التدوينة باوريكم ايش اكثر الاشياء الي مشت معي لما صارت بشرتي جافة

بالنسبة لي طول عمري اعرف بشرتي مختلطة وعندي فقط الانف دهني ، بعد ما اخذت علاج تغير نوع بشرتي وصارت جافة

في البداية عانيت لكن بعد ما رجعت لروتين بشرتي بالشتاء ارتحت له

راح اذكر لكم كل شيء يتعلق بالبشرة الجافة من وضع وازالة المكياج وترطيب البشرة والشفايف والعناية فيها

اول واهم شي لازم تعرفه كل وحدة بشرتها جافة وتعاني منها ان بشرتك تعتمد على مخزون الموية الي بجسمك

اذاً اذا كان جسمك يحتاج موية راح ينعكس هذا على بشرتك

دائما دائما خلي معك قارورة موية واول ما تشوفينها على طول اشربي واذا خلصت خذي لك ثانية لازم تخلين جسمك مترطب عشان بشرتك ما تجف

نجي للمنتجات الي تقدر تساعدك بالترطيب

غسول الوجه ومزيل المكياج

كثير ما يهتمون بايش يغسلون وجههم اهم شي يكون نظيف وهذا اكبر غلط

البشرة تنتج نوع من انواع الزيوت الي يحافظ على نعومتها ورطوبتها ولما نستخدم صابون قوي راح ينزع هاذي الزيوت من البشرة

اكبر خطأ انك تستخدمين صابون لبشرة غير نوع بشرتك مثل البشرة الدهنية لان غسولات البشرة الدهنية تحاول تشيل الدهون من الجلد وانتي لان بشرتك جافة تحتاجين هاذي الزيوت ببشرتك

اذاً انتي بحاجة غسول ( بدون صابون) حتى ينظف لك البشرة بدون ما يدمرها

الغسول الابيض الي على اليمين ( من صيدلية وايتس ) سعره ب 165 هو غسول للوجه خال من الصابون ويحافظ على توازن البشرة ويناسب البشرة الجافة

الي على اليسار ( بايوديرما ) مزيل للمكياج للبشرة الحساسة ويصلح للجافة

يزيل المكياج بدون ما يضرر البشرة

حطيه على قطنة وامسحي فيه يناسب للبشرة وللعيون

بالنسبة لصاحبات البشرة الجافة هو اكثر انواع البشرة المعرضة للاصابة بالتجاعيد في سن مبكر لان طريقة عنايتهم ببشرتهم خاطئة وتفقدها زيوتها وترطيبها الطبيعي

-------------------------------

ترطيب الوجه والجسم 

 طبعا الترطيب هو اهم نقطة بالموضوع ، وعلى كثر ما جربت مرطبات الا اني ما لقيت شي مثل سيتافيل

من اليمين الكبير لترطيب الجسم - الوسط كريم الوجه ( افضل مرطب للبشرة قبل الاساس ) والاخير مثل الوسط لكن معه واقي شمس مثالي للصبح

مجموعة كيو في QV

 المرطب الي على اليمين احبه لكن مستحيل استخدمه على وجهي لاني احسه ثقيل وتسد المسامات  والي اليسار مرطب شفايف احطه وقت النوم لانه ثقييل

 اليمين مرطب للجسم ارطب فيه يديني ، مثالي للي تشتغل في المطبخ

اذا غسلت يدي كثير باليوم تنشف بس اليوم الي ادهن بهذا الكريم لو اغسل كذا مرة ما احس يدي تنشف

يكفي مرة وحدة احطه باليوم

من الصورة باين قد ايش استخدمه

ترطيب الشفايف 

  

ما عندي روتين محدد للشفايف غير الكيو في الي فوق وقت النوم ، غير كذا استخدم من هذولي بالتناوب

اليسار الي مكتوب بالازرق والاصفر عليه هذا حلك اذا يأستي من شفايفك وكانت متشققة تحطين منه 3 مرات باليوم وبس يحرق شوي كأنه كريم عضلات بس يخف الحرارة ويصير بارد

الي جمبه بالمرز اتوقع بزبدة الكاكاو ترطيبه ثقييل بعد مثل كيو في ويناسب وقت النوم

البي بي لبس من ميبلين احسن مرطبات شفايف جربتها ترطب الشفايف وبنفس الوقت خفيفة وريحتها حلوة

الازرق اول مرطب شفايف اخلصه بحياتي واشتري منه كثير

البرتقالي فيه لون احمر يصلح قبل الميك اب عشان يعطي لون خفيف والوردي مثله بس يصير لون فوشي قوي شوي

الابيض الاخير من اليمين هو مرطب غسول الوجه واكتشفته مؤخرا وقريب يخلص ، مب ثقيل بس يعطي لون ابيض كذا على الشفايف مب مرة حلو فيناسب وقت النوم

 كثير ناس يناسبهم فازلين للشفايف بالنسبة لي احسه يسبب لي سواد فما احبه

التقشير

البشرة الجافة تحتاج تقشير على طول ، التقشير يخلي البشرة تتنفس وتتخلص من خلايا البشرة الميتة

التقشير احيانا يسبب التهاب للبشرة وعشان كذا لازم يكون التقشير خفيف وبمنتج يناسب البشرة

البشرة الجافة - وشديدة الجافة تحتاج تقشير خفيف يوميا ، خفيف حتى ما تتضرر البشرة

وتحتاج تقشير عادي مرة بالاسبوع يعني شدي على بشرتك مرة وحدة بالاسبوع وباقي الايام تقشير بالخفيف

من اليسار غسول وجه مقشر شريته من التميمي ، خفيييف مرة واشك انه يقشر زين بس مناسب للتقشير اليومي

الوسط من كليرانس احب استخدمه مرة بالاسبوع او الاسبوعين يقشر كويس وينظف وممتاز لكن فيه ريحة بشعة تشبه ريحة الكلوركس فما احب استخدمه الا نادر

الاخير من اليمين مقشر الوجه من سانت ايفز موجود بالصيدلية تقشير خفيف بعد ويرطب مع التقشير

المقشر عموما يكون مثل الكريم لكن مع حبيبات وكل ما كانت الحبيبات اكبر واكثر كان التقشير اقوى وبالعكس اذا كانت اقل وصغيرة التقشير خفيف

وبالاخير للي ما تحب تقشر بمنتج فيه فرشة كليراسونيك

الكليراسونيك للاسف مب متوفرة عندنا بالسعودية فتطلبونها من النت انا طلبتها من امازون

او من بعض التاجرات بالانستقرام يوفرونها

----------------------

وللي عنده اي اسئلة يتفضل يسألني بالتعليقات

اول على التويتر او الانستقرام

@ZeeaBeauty